Forbairt 2022-2023
Bíonn ár gcampais ag Ollscoil Chathair Bhaile Átha Cliath ag teacht chun cinn i gcónaí de réir mar a oibrímid lena chinntiú go bhfuil ár dtimpeallacht inbhuanaithe agus go bhfuil na háiseanna agus na spásanna teagaisc den chéad scoth ag mic léinn a theastaíonn uathu chun foghlaim agus an rath a bhaint amach. Críochnaíodh agus cuireadh chun cinn roinnt tionscadail mhóra chaipitil le bliain anuas, a raibh go leor díobh mar chuid de Phlean Forbartha Campais uaillmhianach OCBÁC.
Bhaineamar an pointe leath bealaigh amach i mí Bealtaine sa tógáil ar Polaris, príomháis ETIM (Eolaíocht, Teicneolaíocht, Innealtóireacht agus Matamaitic) na hOllscoile, atá suite ag an mbealach isteach ar Ascaill Uí Choileáin chuig ár gcampas i nGlas Naíon. Cuirfidh an foirgneamh 10,000m² níos mó leis an gcáil idirnáisiúnta atá ar OCBÁC i ngeall ar shármhaitheas in ETIM agus beidh an acmhainn aige freastal ar bhreis agus 3,000 mac léinn breise, agus cuirfear ionad nua ar fáil ann freisin do Scoil na Sláinte agus na Feidhmíochta Daonna de chuid OCBÁC.
Osclaíodh an leabharlann nua, Leabharlann Halla Woodlock, go hoifigiúil i mí na Samhna. Rinneadh an t-iar-phroinnteach ar Champas Choláiste na Naomh Uile na Naomh Uile a athfhorbairt ina spás leabharlainne den chéad scoth, ina bhfuil cuid de Bhailiúchán Leabharlann Bhaile an Mhuilinn na nÍosánach. Ainmníodh Mullarkey Pedersen i measc chúigear faighteoirí Ghradaim Chumann Ailtireachta na hÉireann 2022 don dearadh.
Críochnaíodh i mbliana uasghrádú €3m OCBÁC ar na háiseanna ag an Staid Náisiúnta Lúthchleasaíochta. Dheonaigh Comhairle Contae Fhine Gall léas 40 bliain ar an Ollscoil ar Staid Morton in 2022, agus gealladh na háiseanna atá ann a athfhorbairt ar mhaithe le mic léinn agus leis an bpobal áitiúil agus náisiúnta lúthchleasaíochta. Mar chuid den tionscadal, tógadh raon nua taobh istigh agus taobh amuigh, rinneadh uasghráduithe ar an halla gleacaíochta ardfheidhmíochta agus ar na seomraí gléasta agus cuireadh suíocháin nua ar fáil ar an seastán.
Príomhghné de Phlean Forbartha an Champais is ea cóiríocht do mhic léinn a fhorbairt ar Champas Ghlas Naíon. Thug an rialtas tacaíocht do na pleananna seo ar fáiltíodh roimpi nuair a d’fhógair an tAire Breisoideachais agus Ardoideachais, Taighde, Nuálaíochta agus Eolaíochta, Simon Harris, T.D., infheistíocht breis agus €40 milliún chun tacú le 405 leaba chóiríochta do mhic léinn a sholáthar.
Tá cead pleanála ag an Ollscoil do 1,240 leaba, ach mar gheall ar chostais tógála atá ag dul i méid, ní raibh cóiríocht inacmhainne ar champas a fhorbairt inmharthana in éagmais tacaíocht ón stát.
Beidh fóirdheontas leanúnach bliantúil á sholáthar ag an ollscoil lena chinntiú go mbíonn leapacha chomh hinacmhainne agus is féidir do mhic léinn agus dá dteaghlaigh. Beidh ráta lascainithe ar fáil d’fhaighteoirí deontais SUSI do chuid den acmhainn nua.